Na nosa memoria · Coro Crecente

José Luis Segade Ferreiro

«Pillo»

Coro Crecente

Empresario compostelán e coralista desde neno, Pillo tiña esa vontade incansable de sumar a súa voz a calquera proxecto que xuntase xente para cantar. Formou parte da gran masa coral que tece a vida cultural de Compostela e deixou nela unha fonda pegada musical.

A cuncha de bronce que hoxe entregamos aos galardoados do Premio Compostela faina a empresa que el creou.

Na súa memoria compúxose
Amigo adeus
Música e letra de Juan Carlos Cobas Prieto · arranxo de Anne Tooming

Juan García Puente

Coro Crecente

Traballador da sanidade e cantor desde pequeno, Juan foi un dos alicerces do noso coro. A súa voz e a súa amizade enchían de ledicia os ensaios, e o seu baleiro é un dos que máis sentimos.

Na súa lembranza e na de Pillo naceu en 2024 o Certame Memorial, que cada ano xunta os coros de Compostela.

Na súa memoria compúxose
Cantos de amor e fe
Música e letra de Juan Carlos Cobas Prieto

Rafael Rey Díaz

Coro Crecente desde 2024 · faleceu en 2026

Profesor de artes aplicadas e un dos grandes empresarios da cidade, presidiu o Grupo Distrisantiago, que levou da distribución de prensa a converterse nunha das principais distribuidoras de papelería de España.

Chegou a Crecente en 2024 e deixou unha pegada que nos acompaña sempre: foi el quen encargou o deseño do logotipo do coro, a imaxe que hoxe nos representa.

D. Nemesio García Carril

Mestre de capela da Catedral de Santiago

Sobrado dos Monxes · faleceu no verán de 2025

Compositor, director e musicólogo, estudou nos conservatorios de Santiago e da Coruña e ampliou a súa formación en Roma. En 1971 foi nomeado mestre de capela da Catedral de Santiago e director da Escolanía Anxeles de Compostela: o derradeiro dunha longa liñaxe de mestres que comeza en Jácome de Carrión.

Foi profesor en Santiago, Pontevedra, Lisboa e Granada, e recibiu o Premio da Crítica Galega en 1984. A súa ampla obra coral, afondada na tradición galega, forma parte do repertorio de calquera coro do país, tamén do noso. Foi o primeiro mestre do noso director.

Cantamos del, entre outras,
Romance de Don Gaiferos
harmonización para catro voces e órgano (1976)